ಬೆಂಗಳೂರು : ತುಂಗಭದ್ರಾ ಜಲಾಶಯದಿಂದ ರಾಯಚೂರು, ಕೊಪ್ಪಳ, ಬಳ್ಳಾರಿ ಮತ್ತು ವಿಜಯನಗರ ಜಿಲ್ಲೆಗಳ ಕುಡಿಯುವ ನೀರು ಹಾಗೂ ನಿಂತ ಬೆಳೆಗಳಿಗಾಗಿ ನವೆಂಬರ್ 20ರವರೆಗೆ ಮಾತ್ರ ನೀರು ಹರಿಸಲು ನೀರಾವರಿ ಸಲಹಾ ಸಮಿತಿ (ICC) ಸಭೆಯಲ್ಲಿ ನಿರ್ಧರಿಸಲಾಗಿದೆ. ಸಚಿವ ಹಾಗೂ ನೀರಾವರಿ ಸಲಹಾ ಸಮಿತಿ ಅಧ್ಯಕ್ಷರಾದ ಶಿವರಾಜ್ ಎಸ್. ತಂಗಡಗಿ ಅವರ ಅಧ್ಯಕ್ಷತೆಯಲ್ಲಿ ವಿಕಾಸಸೌಧದಲ್ಲಿ ನಡೆದ ಸಭೆಯ ಬಳಿಕ ಈ ಅಧಿಕೃತ ಘೋಷಣೆ ಹೊರಬಿದ್ದಿದೆ.
ಜಲಾಶಯದಲ್ಲಿ ಒಟ್ಟು 53 ಟಿಎಂಸಿ ನೀರು ಲಭ್ಯವಿದ್ದು, ಇದರಲ್ಲಿ ಡೆಡ್ ಸ್ಟೋರೆಜ್ 2 ಟಿಎಂಸಿ ಮತ್ತು ಆವಿಯಾಗುವಿಕೆಗೆ 3.50 ಟಿಎಂಸಿ ಹೋಗಲಿದೆ. ಉಳಿದ ನೀರಿನಲ್ಲಿ ರಾಜ್ಯದ ಪಾಲು 25.25 ಟಿಎಂಸಿ, ಆಂಧ್ರಪ್ರದೇಶಕ್ಕೆ 18.50 ಟಿಎಂಸಿ ಹಾಗೂ ತೆಲಂಗಾಣದ ಪಾಲು 1.50 ಟಿಎಂಸಿ ಎಂದು ಹಂಚಿಕೆ ಮಾಡಲಾಗಿದೆ. ಬರಗಾಲ ಹಾಗೂ ಮುಂದಿನ ಬೇಸಿಗೆಯನ್ನು ದೃಷ್ಟಿಯಲ್ಲಿಟ್ಟುಕೊಂಡು ಜನ-ಜಾನುವಾರುಗಳ ಕುಡಿಯುವ ನೀರಿಗೆ ಪ್ರಥಮ ಆದ್ಯತೆ ನೀಡಿ ಈ ನಿರ್ಧಾರ ಕೈಗೊಳ್ಳಲಾಗಿದೆ ಎಂದು ಸರ್ಕಾರ ಸಮರ್ಥಿಸಿಕೊಂಡಿದೆ.ಒಟ್ಟು ನೀರಿನ ಸಂಗ್ರಹ : 53 ಟಿಎಂಸಿ (ರಾಜ್ಯದ ಪಾಲು: 25.25 ಟಿಎಂಸಿ).
ಎಡದಂಡೆ ಮುಖ್ಯಕಾಲುವೆ : ಅಕ್ಟೋಬರ್ 21 ರಿಂದ ನವೆಂಬರ್ 20 ರವರೆಗೆ 3800 ಕ್ಯೂಸೆಕ್ಸ್ನಂತೆ (ಪ್ರತಿ ವಿಭಾಗದಿಂದ 200 ಕ್ಯೂಸೆಕ್ಸ್ ಉಳಿತಾಯ ಮಾಡಿ ಗಣೇಕಲ್ ಜಲಾಶಯಕ್ಕೆ) ನೀರು ಒದಗಿಸುವುದು.
ಬಲದಂಡೆ ಮೇಲ್ಮಟ್ಟದ ಕಾಲುವೆ : ಅಕ್ಟೋಬರ್ 21 ರಿಂದ 24 ರವರೆಗೆ 1000 ಕ್ಯೂಸೆಕ್ಸ್, ಅಕ್ಟೋಬರ್ 25 ರಿಂದ 31 ರವರೆಗೆ ನೀರು ಸಂಪೂರ್ಣ ನಿಲುಗಡೆ. ಬಳಿಕ ನವೆಂಬರ್ 1 ರಿಂದ 20 ರವರೆಗೆ 20 ದಿನಗಳ ಕಾಲ 1280 ಕ್ಯೂಸೆಕ್ಸ್ ನಂತೆ ನೀರು ಹರಿಸಲಾಗುವುದು.
ಬಲದಂಡೆ ಕೆಳಮಟ್ಟದ ಕಾಲುವೆ: ಅಕ್ಟೋಬರ್ 21 ರಿಂದ ನವೆಂಬರ್ 20 ರವರೆಗೆ 650 ಕ್ಯೂಸೆಕ್ಸ್ನಂತೆ ನೀರು.
ರೈತರಿಗೆ ಎದುರಾಗಿರುವ ಗಂಭೀರ ಆತಂಕ ಮತ್ತು ಅನ್ಯಾಯದ ಮುನ್ಸೂಚನೆ:
ಸರ್ಕಾರ ಜಾರಿಗೆ ತಂದಿರುವ ಈ ಸೀಮಿತ ಅವಧಿಯ ನೀರು ಹಂಚಿಕೆ ನಿರ್ಧಾರವು ಅನ್ನದಾತರ ನಿದ್ದೆಗೆಡಿಸಿದ್ದು, ಕಣ್ಣೀರಿನ ಕಥೆಗೆ ಮುನ್ನುಡಿ ಬರೆದಿದೆ. ವರದಿಯಲ್ಲಿರುವ ಅಂಶಗಳ ಆಧಾರದ ಮೇಲೆ ರೈತರಿಗೆ ಆಗುತ್ತಿರುವ ಗಂಭೀರ ಅನ್ಯಾಯದ ಕರಾಳ ಚಿತ್ರಣ ಇಲ್ಲಿದೆ:
1. ನಿಂತ ಬೆಳೆಗಳ ರಕ್ಷಣೆಗೆ ಕೇವಲ ಒಂದು ತಿಂಗಳ ಗಡುವು :
ಜಲಾಶಯದಲ್ಲಿ ನೀರಿಲ್ಲದ ಕಾರಣ ನವೆಂಬರ್ 20ರವರೆಗೆ ಮಾತ್ರ ನೀರು ಹರಿಸಲು ತೀರ್ಮಾನಿಸಲಾಗಿದೆ. ಆದರೆ, ರೈತರು ತಮ್ಮ ಜಮೀನುಗಳಲ್ಲಿ ಭತ್ತ ಹಾಗೂ ಇತರೆ ಪ್ರಮುಖ ಬೆಳೆಗಳನ್ನು ನಂಬಿ ಲಕ್ಷಾಂತರ ರೂ. ಖರ್ಚು ಮಾಡಿದ್ದಾರೆ. ಬೆಳೆಗಳು ಇನ್ನೂ ಕಾಯ್ದು ಕಟಾವಿಗೆ ಬರುವ ಹಂತದಲ್ಲಿರುವಾಗಲೇ ನೀರು ನಿಲ್ಲಿಸಿದರೆ, ಕೈಗೆ ಬಂದ ತುತ್ತು ಬಾಯಿಗೆ ಬಾರದಂತಾಗಿ ಇಡೀ ಬೆಳೆ ಒಣಗಿಹೋಗುವ ಭೀತಿ ಎದುರಾಗಿದೆ.
2.ಕಾಲುವೆಗಳಿಗೆ ಕಡಿತಗೊಳಿಸಲಾದ ನೀರಿನ ಪ್ರಮಾಣ:
ವಿಶೇಷವಾಗಿ ಬಲದಂಡೆ ಮೇಲ್ಮಟ್ಟದ ಕಾಲುವೆಗೆ ಅಕ್ಟೋಬರ್ ಕೊನೆಯ ವಾರದಲ್ಲೇ (ಅ. 25 ರಿಂದ ಅ. 31) ಸಂಪೂರ್ಣ ನೀರು ನಿಲುಗಡೆ ಮಾಡಲಾಗುತ್ತಿರುವುದು ಮತ್ತು ನವೆಂಬರ್ನಲ್ಲಿ ಕೇವಲ 1280 ಕ್ಯೂಸೆಕ್ಸ್ ಮಾತ್ರ ನೀರು ಹರಿಸುತ್ತಿರುವುದು ಕಾಲುವೆಯ ಕೊನೆ ಭಾಗದ ರೈತರಿಗೆ ಮರಣಶಾಸನವಾಗಲಿದೆ. ತೀವ್ರ ನೀರಿನ ಕೊರತೆಯಿಂದಾಗಿ ಕೊನೆ ಭಾಗದ ಜಮೀನುಗಳಿಗೆ ನೀರು ತಲುಪದೇ ಬೆಳೆಗಳು ಸಂಪೂರ್ಣ ನಾಶವಾಗಲಿವೆ.
3. ಪರ್ಯಾಯ ವ್ಯವಸ್ಥೆಯಿಲ್ಲದ ಸಂಕಷ್ಟ:
ರಾಜ್ಯದಲ್ಲಿ ಈಗಾಗಲೇ ಮಳೆಯಾಗದೆ ಬರಗಾಲದ ಛಾಯೆ ಮುಂದುವರಿದಿದೆ. ಅಂತರ್ಜಲ ಕುಸಿದಿದ್ದು, ಬೋರ್ವೆಲ್ಗಳು ಬತ್ತಿ ಹೋಗಿವೆ. ತುಂಗಭದ್ರಾ ನಂಬಿಕೊಂಡೇ ಲಕ್ಷಾಂತರ ಎಕರೆ ಪ್ರದೇಶದಲ್ಲಿ ಕೃಷಿ ಚಟುವಟಿಕೆ ನಡೆಯುತ್ತಿದ್ದು, ಕಾಲುವೆ ನೀರು ಬಂದ್ ಆದರೆ ರೈತರು ಅತಂತ್ರರಾಗಲಿದ್ದಾರೆ.
ರೈತ ಮುಖಂಡರ ಆಕ್ರೋಶ ಹಾಗೂ ಆಗ್ರಹ :
ದರೂರು ಪುರುಷೋತ್ತಮಗೌಡ, ಅಧ್ಯಕ್ಷರು, ತುಂಗಭದ್ರಾ ರೈತ ಸಂಘ :
ಸಿದ್ದಾಪುರ ಮಲ್ಲಿಕಾರ್ಜುನಗೌಡ ಹೊಸಮನಿ ( ಅಧ್ಯಕ್ಷರು, ತುಂಗಭದ್ರಾ ಅಭಿವೃದ್ಧಿ ಹೋರಾಟ ಸಮಿತಿ ಮತ್ತು ಸಂಚಾಲಕರು, ತುಂಗಭದ್ರಾ ಉಳಿಸಿ-ರೈತರನ್ನು ರಕ್ಷಿಸಿ ಆಂದೋಲನ. ) :

