Kalyanarajya

ಮಹಿಳೆಯನ್ನು ನಡುರಸ್ತೆಯಲ್ಲಿ ಎಳೆದೊಯ್ದು ಮಾದನಾಯಕನಹಳ್ಳಿ ಇನ್ಸ್‌ಪೆಕ್ಟರ್‌ ದೌರ್ಜನ್ಯ, ವರದಿ ಕೇಳಿದ ಮಹಿಳಾ ಆಯೋಗ.

 ದಾಸನಪುರ ಎಪಿಎಂಸಿಯಲ್ಲಿ ನಡೆದ ಪ್ರತಿಭಟನೆ ವೇಳೆ ಮಹಿಳೆಯರ ಮೇಲೆ ಪೊಲೀಸರು ನಡೆಸಿದ ದೌರ್ಜನ್ಯಕ್ಕೆ ವ್ಯಾಪಕ ಆಕ್ರೋಶ ವ್ಯಕ್ತವಾಗಿದೆ. ಮಹಿಳೆಯ ಮೊಬೈಲ್ ಕಸಿದು, ನಡುರಸ್ತೆಯಲ್ಲಿ ಎಳೆದೊಯ್ದ ಘಟನೆ ಕುರಿತು ರಾಜ್ಯ ಮಹಿಳಾ ಆಯೋಗವು ತೀವ್ರ ಕಳವಳ ವ್ಯಕ್ತಪಡಿಸಿದ್ದು, ಗ್ರಾಮಾಂತರ ಜಿಲ್ಲಾ ಎಸ್ಪಿಯಿಂದ ವರದಿ ಕೇಳಿದೆ. ಇನ್ಸ್‌ಪೆಕ್ಟರ್‌ಗಳಾದ ಮುರಳೀಧರ್‌ ಮತ್ತು ನರೇಂದ್ರಬಾಬು ಅವರ ಅಮಾನುಷ ನಡೆಗೆ ಆಯೋಗ ತೀವ್ರ ಖಂಡನೆಯನ್ನು ವ್ಯಕ್ತಪಡಿಸಿದೆ.   

ಹೈಲೈಟ್ಸ್‌:

* ಮಹಿಳೆಯನ್ನು ದರ ದರನೆ ಎಳೆದೊಯ್ದಿದ್ದ  ಮಾದನಾಯಕನಹಳ್ಳಿ ಠಾಣೆ ಇನ್ಸ್‌ಪೆಕ್ಟರ್‌ ಇನ್ಸ್‌ಪೆಕ್ಟರ್‌

* ಮೊಬೈಲ್‌ ಕಸಿದು ಧಮ್ಕಿ ಹಾಕಿದ್ದ ಖಾಕಿ ನಡೆಗೆ ತೀವ್ರ ಆಕ್ರೋಶ, ವರದಿ ಕೇಳಿದ ಮಹಿಳಾ ಆಯೋಗ

* ಖಾಕಿ ದುಂಡಾವರ್ತನೆಗೆ ವ್ಯಾಪಕ ಆಕ್ರೋಶ, ಜಿಲ್ಲಾ ಎಸ್ಪಿಗೆ ಸೋಮವಾರ ಪತ್ರ ಬರೆದ ನಾಗಲಕ್ಷ್ಮೀ ಚೌಧರಿ. 

ಬೆಂಗಳೂರು: ದಾಸನಪುರ ಎಪಿಎಂಸಿಯಲ್ಲಿ ಏಜೆಂಟರಿಂದ ರೈತರಿಗೆ ಆಗುತ್ತಿದ್ದ ಅನ್ಯಾಯ ಖಂಡಿಸಿ ನಡೆದ ಪ್ರತಿಭಟನೆಯಲ್ಲಿ ಮಹಿಳೆಯೊಬ್ಬರ ಮೊಬೈಲ್‌ ಕಸಿದು, ನಡುರಸ್ತೆಯಲ್ಲಿಯೇ ದರದರನೇ ಎಳೆದೊಯ್ದು ದೌರ್ಜನ್ಯ ಎಸಗಿದ್ದ ಮಾದನಾಯಕಹಳ್ಳಿ ಠಾಣೆ ಪೊಲೀಸರ ನಡೆಗೆ ವ್ಯಾಪಕ ಆಕ್ರೋಶ ವ್ಯಕ್ತವಾಗುತ್ತಿದೆ. 

ಈ ಬೆನ್ನಲ್ಲೇ ಮಹಿಳೆಯ ಮೇಲೆ ನಡೆದ ಅಮಾನುಷ ಕೃತ್ಯದ ಬಗ್ಗೆ ಆಘಾತ ವ್ಯಕ್ತಪಡಿಸಿರುವ ರಾಜ್ಯ ಮಹಿಳಾ ಆಯೋಗವು ಘಟನೆ ಕುರಿತು ವರದಿ ನೀಡುವಂತೆ ಗ್ರಾಮಾಂತರ ಜಿಲ್ಲಾ ಪೊಲೀಸ್‌ ವರಿಷ್ಠಾಧಿಕಾರಿಗೆ ಪತ್ರ ಬರೆದಿದೆ. 

ಪ್ರಮುಖವಾಗಿ ಮಹಿಳೆಯನ್ನು ನಡುರಸ್ತೆಯಲ್ಲಿ ಎಳೆದೊಯ್ದ ಮಾದನಾಯಕನಹಳ್ಳಿ ಠಾಣೆ ಇನ್ಸ್‌ಪೆಕ್ಟರ್‌ ಮುರಳೀಧರ್‌ ಹಾಗೂ ಕೆಆರ್‌ಎಸ್‌ ಕಾರ್ಯಕರ್ತರ ಮೊಬೈಲ್‌ ಕಸಿದು ದಬ್ಬಾಳಿಕೆ ಮೆರೆದಿದ್ದ ನೆಲಮಂಗಲ ಗ್ರಾಮಾಂತರ ಠಾಣೆ ಇನ್ಸ್‌ಪೆಕ್ಟರ್‌ ನರೇಂದ್ರಬಾಬು ನಡೆಯನ್ನು ಆಯೋಗವು ತೀವ್ರವಾಗಿ ಖಂಡಿಸಿದೆ.

ಅಷ್ಟೇ ಅಲ್ಲದೆ, ಪೊಲೀಸರು ನಡೆಸಿರುವ ದೌರ್ಜನ್ಯದ ಕುರಿತು ನಿಯಮಾನುಸಾರ ಪರಿಶೀಲಿಸಿ, ಇದಕ್ಕೆ ಕಾರಣರಾದವರ ವಿರುದ್ಧ ಕ್ರಮ ಜರುಗಿಸಿ ಅತಿ ಶೀಘ್ರದಲ್ಲಿ ವರದಿ ನೀಡುವಂತೆ ಎಸ್ಪಿಗೆ ಆಯೋಗವು ಕೋರಿದೆ. ಮಹಿಳಾ ಆಯೋಗದ ಅಧ್ಯಕ್ಷೆ ನಾಗಲಕ್ಷ್ಮೀ ಚೌಧರಿ ಸೂಚನೆ ಮೇರೆಗೆ ಕಾರ್ಯದರ್ಶಿಗಳು ಜಿಲ್ಲಾ ಎಸ್ಪಿಗೆ ಸೋಮವಾರ ಪತ್ರ ಬರೆದಿದ್ದಾರೆ.

ದೌರ್ಜನ್ಯದ ವಿಡಿಯೋಗಳು ವೈರಲ್‌ :

ದಾಸನಪುರ ಎಪಿಎಂಸಿಯಲ್ಲಿ ಏಜೆಂಟರಿಂದ ರೈತರಿಗೆ ಆಗುತ್ತಿದ್ದ ಅನ್ಯಾಯ ಖಂಡಿಸಿ ನಡೆದ ಪ್ರತಿಭಟನೆ ಹತ್ತಿಕ್ಕಲು ಪೊಲೀಸರು ಬಲಪ್ರಯೋಗ ಮಾಡಿರುವ ವಿಡಿಯೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್‌ ಆಗಿವೆ. ಮಹಿಳೆಯೊಬ್ಬರ ಮೊಬೈಲ್‌ ಕಿತ್ತುಕೊಂಡಿದ್ದು, ಅವರು ವಾಪಸ್‌ ನೀಡುವಂತೆ ಪರಿಪರಿಯಾಗಿ ಬೇಡಿದರೂ ಪೊಲೀಸರು ನೀಡಿಲ್ಲ. ಜತೆಗೆ, ಮಹಿಳೆಯನ್ನು ನಡುರಸ್ತೆಯಲ್ಲಿಯೇ ಎಳೆದೊಯ್ದು ಕ್ರೌರ್ಯ ಮೆರೆದಿದ್ದಾರೆ.

ಮತ್ತೊಂದು ವಿಡಿಯೋದಲ್ಲಿ ವ್ಯಕ್ತಿಯೊಬ್ಬನನ್ನು ಸುಮಾರು ನಾಲ್ವರು ಪೊಲೀಸರು ನೆಲದ ಮೇಲೆ ಕೆಡವಿಕೊಂಡಿದ್ದಾರೆ. ನೆಲಕ್ಕೆ ಬಿದ್ದ ವ್ಯಕ್ತಿ ಕಿರುಚಾಡಿದರೂ ಕರುಣೆ ತೋರದೆ ದೌರ್ಜನ್ಯ ಎಸಗಿದ್ದಾರೆ. ಅಷ್ಟೇ ಅಲ್ಲದೆ, ಪ್ರತಿಭಟನಾಕಾರರನ್ನು ಅಟ್ಟಾಡಿಸಿಕೊಂಡು ಹಿಡಿದುಕೊಂಡಿದ್ದಾರೆ. ಈ ವೇಳೆ ವೃದ್ಧೆಯೊಬ್ಬರು ಕೆಳಕ್ಕೆ ಬಿದ್ದು ಗಾಯಗೊಂಡಿದ್ದಾರೆ.

ದೌರ್ಜನ್ಯ ಆಕ್ಷೇಪಿಸಿದ್ದ ಮೂವರನ್ನು ಬಂಧಿಸಿರುವುದನ್ನು ಪ್ರಶ್ನಿಸಿದ ಆರು ಮಂದಿ ಕೆಆರ್‌ಎಸ್‌ ಕಾರ್ಯಕರ್ತೆಯರನ್ನು ಅಟ್ಟಾಡಿಸಿ ಹಲ್ಲೆ ನಡೆಸಿ ಬಂಧಿಸಲಾಗಿತ್ತು ಎಂದು ಆರೋಪಿಸಲಾಗಿತ್ತು. ಸರಕಾರಿ ಕರ್ತವ್ಯಕ್ಕೆ ಅಡ್ಡಿ ಆರೋಪದ ಗುರಾಣಿ ಬಳಸಿ ಕಾರ್ಯಕರ್ತರನ್ನು ಬಂಧಿಸಲಾಗಿತ್ತು ಎಂದು ಕೆಆರ್‌ಎಸ್‌ ಆರೋಪಿಸಿದೆ.


Post a Comment

Previous Post Next Post